Mu myazi iteziri ikyooba bweneene na iyandikabiika ikyooba ku baandu abaliri nga twehe Bafuliiru, iliri myazi ye bita. Umufuliiru kera abona bingi ukushagira ku Mulele ukuhisa zene.

Uwalirongwiri ikihugo kitu Congo, Joseph Kabila, amenyeesa kwo akola agalwisa ikisirikani kye kihugo kitu. Mu bizunguuza ibikulikiriini (video), ategwaajika no kuyerekana kwo ngisi byo akaheruki huuna utwaziri ikihugo kitu zeene, Prezida Felix Tshisekedi ne guvernema atwaziri, kwo bitakakolerwa kwohe na yukwo abona kwo aluha. Yukwo kuluha kwage yehe kunabagage kwatuma agabona kwo ukuyabiira imbundusi kwo kugatabaala yibyo biindu byage biyuvwakane.

Joseph Kabila aloziizi biki?

Uno ukaroongora ikihugo kitu kye Congo, adeeta kwo aloziizi ukushweekula abaandu ukubasaaza mu ndwaro ya ngisi utwaziri zeene. Ayerekana kwo AbaKongamani batwazirwi buligo zeene ne kihugo kiliri habi. Mu magambo gage adeta bingi no kuyerekana higulu lyo bwitani na ngisi kwo ubugale ubuli mw'idaho lye kihugo kitu bwagulisibwa kera na ngisi abatwaziri ku zeene.

Guno mwazi gwaleeta umwijingeerwe mwingi ne bibuuzo bingi bweenene mu baandu booshi: Abafuliiru n'abaKongomani na be Mahanga. Bo kusalira bagweeti bagayibuuza bingi. Ishuvyo lyakaya ukuloonga.

Ibyasomeeza bingi kuliri kubona kwo ngisi uwaja kwo auijitabaala UmuKongomani haliko ayibikaga kuguma no mugoma we M23. Ku ngisi abatayiiji, bano be M23 baliri basirikani abamulwiisa ubwatwali ubuliri hohe mu Congo., Bakagwaata uwaya tuhamu tumuberengira kapitale twe provense ziribiri: Nord-Kivu (Goma) ne Sud-Kivu (Bukavu) kushagira indondeero zo mwaka gwe 2025. Bano banabe bakakola amabi mingi mu twaya twingi bakalenga mwo, kiri na mu Buvira bingi bakafwa.

Ukuba atagweeti ibiindu angabwira abaandu higulu lyo kubashweekula, bashuba bagayuvwa. Haliko ukuba kuguma no mugoma, byayama byagangana bingi byanatuma kiri na ngisi abashuba kuguma nayehe mu chama kyage kye PPRD bayamimuyiyogokola. Mu yabo haliri umukazi ukaba ministre we Justice, amubengirwa Marie Ange Mushobekwa, n'abaandi batali na baniini.

Bano bana M23 bayijikini ukuba bamutabalwa ne kihugo kye Rwanda. Bino binatume abaandu bingi bagayami rakara bweneene ukubona kwo ukatwala ikihugo angagenda agendi yishwekera kuguma no mugoma.

Abali ku butwaazi nabo kwokuno bagweeti bagayibiika ibiringi higulu ikihugo kitatugendane.

Ku kino kinyerere abaandu bagweeti bagalindira bamenye ngisi kwo ibindu bigaba.

Umufuliiru amenye biki? Akole biki?

Umufuliiru yekadeta kwo utayiyeka bugoma atamenya kwo buleenga.

Bwangabiri buhirwa tusalire bweneene imbere tugakola kyokyooshi kilya kandi li ukuyihega ku luhande luno kanid li lulira. Ikihamu kuliri kuhunira ikihugo kitu kiloonge umutula ukugalama.